میٹا نے یورپ میں فیس بک اور انسٹاگرام بند کرنے کی دھمکی دے دی

نیو یارک (ویب ڈیسک) امریکہ کی سوشل میڈیا کمپنی “میٹا” نے یورپ میں اپنی سوشل ویب سائٹس فیس بک اور انسٹاگرام بند کرنے کی دھمکی دی ہے۔ کمپنی نے سیکیورٹیز اینڈ ایکسچینج کمیشن میں ایک رپورٹ جمع کرائی ہے جس میں کہا گیا ہے کہ اگر ڈیٹا ٹرانسفر کا نیافریم ورک تیار نہ کیا گیا تو وہ اپنی سروسز معطل کرنے پر مجبور ہوگی۔ میٹا کی جانب سے یہ دھمکی ایک ایسے وقت میں دی گئی ہے .

جب یورپی یونین نے حال ہی میں ایک ایسا قانون منظور کیا ہے جس کے تحت فیس بک جیسی کمپنیوں کو یورپی یونین کا ڈیٹا یونین کے اندر ہی یورپی سروز پر پراسیس کرنا ہوگا۔ فیس بک اور انسٹاگرام کا ڈیٹا امریکہ اور یورپ کے سرورز پر پراسیس ہوتا ہے جس کی وجہ سے کمپنی کا کہنا ہے کہ وہ صرف اور صرف یورپ میں ڈیٹا پراسیس نہیں کرسکتی۔ میٹا کے نائب صدر برائے بین الاقوامی امور نگ کلیگ کا کہنا ہے کہ اگر فیس بک نے یورپ میں اپنی سروسز بند کیں تو اس سے وہ کاروبار بہت زیادہ متاثر ہوں گے جو فیس بک کے اشتہارات پر چلتے ہیں۔