مادری زبانوں کا عالمی دن اور معدومیت کا خطرہ

زبانیں انسانی ثقافت کا ایک بھرپور اور متنوع پہلو ہیں۔ دنیا بھر میں ایک اندازے کے مطابق سات ہزار زبانیں بولی جاتی ہیں۔ یہ زبانیں مختلف ثقافتوں، عقائد اور روزمرہ طرزِ زندگی کی نمائندگی کرتی ہیں، اور ہر ایک کی منفرد تاریخ و ترقی ہے۔
دنیا کی سب سے زیادہ بولی جانے والی زبانوں میں چینی، ہسپانوی، انگریزی، ہندی، اردو اور عربی شامل ہیں، جنھیں لاکھوں لوگ اپنی پہلی یا دوسری زبان کے طور پر استعمال کرتے ہیں۔ ایک اندازے کے مطابق دنیا کی بحیثیتِ مجموعی نصف زبانیں خطرے سے دوچار ہیں۔ ان کے بولنے والوں کے دنیا سے چلے جانے، عالمگیریت یا غالب زبانوں کے استعمال کی طرف منتقل ہونے کے باعث معدوم ہونے کا خطرہ ہے۔ بہت سے ماہرینِ لسانیات اور ثقافتی تحفظ کی تنظیمیں ان زبانوں کے معدوم ہونے کے پیشِ نظر ان کی دستاویزات، حروفِ تہجی، رسم الخط اور حفاظت کےلیے کام کر رہی ہیں۔ ہر زبان کے مرکز میں اس کے بولنے والے ہوتے ہیں، جو اپنی مادری زبان اور ثقافت کو آنے والی نسلوں تک پہنچاتے ہیں۔